بیری سیاسی لە هەرێمی كوردستاندا
ڕۆژی چوارشەممە 21ی 5ی 2025، ئینستیتۆی توێژینەوە و گەشەپێدان- کوردستان، سەمینارێکی لەسەر دیاردە تایبەتییەکانی بیری سیاسی لە هەرێمی کوردستان ساز كرد، کە تێیدا بەڕێزان دکتۆر عومەر نوورەدینی، باسێکی لەبارەی (پەیوەندیی نێوان حزب و دەسەڵاتی سیاسی- نموونەی هەرێمی کوردستان) و سەرۆ قادر باسێکی لە (ڕەوتە نامۆکانی ناو بیر و بزووتنەوەی سیاسیی كوردستان) پێشكەش كرد.
لە بەشی یەكەمی سەمیناردا، دكتۆر عومەر نوورەدینی باسی لە حزبی سیاسیی كوردستانی كرد و بەراوردكارییەكی لەبارەی حزبی كوردی و حزبە جیهانییەكانەوە خستە ڕوو.
هاوكات بنەما سەرەكییەكانی حزبی سیاسیی كوردستانی شی كردەوە و گرنگترین پەرەسەندنە سیاسییەكانی مێژووی حزبی سیاسیی لە كوردستان خستە ڕوو.
نوورەدینی پێی وابوو لەنێو بارودۆخی سیاسیی كوردستاندا و بەپێی هەلومەرجی ژیان لە كوردستاندا، حزبی سیاسی ڕۆڵی سەرەكیی لە پرسی هۆشیاری و ڕزگاریدا بینیوە و زۆرجاریش بۆشایی نەبوونی هێزی دەوڵەتی بۆ كورد پڕ كردووەتەوە؛ لە هەمان كاتدا گرفت و كەموكورتییەكانی حزبی سیاسیی لە كوردستان خستە ڕوو.
لە بەشی دووەمی سەمیناردا، نووسەر سەرۆ قادر، پرسی "شۆڕشگێڕان و حزبی سیاسی"ی خستە ڕوو. نووسەر لەبارەی ڕوانگەی شۆڕشگێڕان، ناڕوونیی دیدگای سیاسی، شەرعییەتی شۆڕشگێڕی، ڕەفتاری دەسەڵاتخوازانە و دامەزراندنی پانتایی سیاسی لە دوای ڕاپەڕین بۆچوونەكانی خستە ڕوو.
سەرۆ قادر، باسی لە هەلومەرجی پێكەوەنانی دامەزراوەكانی هەرێمی كوردستانی لە سایەی حزبی سیاسیی كوردستانی كرد و گرفت و كێشەكانی ئەو بەدامەزراوەییبوونەی خستە ڕوو كە لە ناو بزووتنەوەی سیاسیی كوردستاندا تێبینی دەكرێت.
نووسەر ئەوەی خستە ڕوو، كە واقیعبینی و زانستخوازی و پابەندبوون بە دادگەرییەوە، لە سەد ساڵی ڕابردوودا بنەمای ڕزگاریی چەند گەلێك بوون كە سەركردەكانیان پیادەیان كردووە. لە بەرانبەردا ئەو كۆمەڵگانەی بۆ ئەو بنەمایانە نەگەڕانەوە، تووشی تەنگوچەڵەمە و شەڕی ناوخۆ و كێشەی ستراتیجی بوون.
لە دوای پێشكەشكردنی سەمینار، گفتوگۆی هەمەلایەنە كرا و کتێبی (سەرکردەکان و حوکمڕانی)، لە نووسینی سەرۆ قادر، پێشکەش بە ئامادەبووان كران.
